Poem 6 of 30 - April 8 - Jes so we does talk

Jes so we does talk

We push chin up say dat cooyah mout

say when de neighbor say it look like dem

people really going an put up dat ugly pink

house wit one setta flag in de yard – fuh dat.

We say she have de man like a coonoomoonoo.

Tabanca ha de man walkin de road like a pappy

show.  

We bottle and spoon refrain…

By the corner: Dis muddercunt gettin meh damn

vex. Ms. Mora light skin daughter pass: Mornin

family. And gorn back to – is a good planass

he want, oui

We suck teeth refrain

You eh even get a lil pull-tongue self?

You eh bettin you is a waisahtime nah.

Aye boy – bring back 2 ponga flour

2 ponga sugar and a ponga buttah

We cocoyea broom refrain

Smell dat hot bread – carry 2

fuh Ms. Ivy. Carry 2 fuh Aunty

Dolly. Carry 2 fuh Ms. Mavis.

Come back straight. Drink dis

beer.  It hot outside. Study

yuh book. Say yuh prayers.

To schedule a reading or an appearance please contact Ofer Ziv at Blue Flower Arts at 845-677-8559 or email ofer@blueflowerarts.com. www.facebook.com/rogerbonairagard www.twitter.com/rogerbonair www.cypherbooks.com